Gratulaziun ad in zun activ scribent romontsch:                pdfPils sissontatschun
Vic Hendry va els 65

(gc) Buca da crer, mo Vic Hendry, igl attaschau Tuatschin a Schaffusa ei ius quels dis els 65. Jeu quetel sco sch'ei fuss stau ier che la GR veva gratulau ad el sils 60. Ella ni sa ni astga tralaschar d'admetter era quella gada auguris cordials, pertgei il giubilar ei in da ses pli fidai correspondents e defensurs.

In messadi clar ed aviert
Igl ei era il mument da dir a Vic Hendry - ed a tuts scribents che contribueschan alla pressa romontscha - in sincer Dieus paghi. Sco fins observaders dalla scena actuala han els adina zatgei da dir alla publicitad - e pil solit eisi essenzial. Scribents, poets e schurnalists scrivan tuttavia buca per passatemps, mobein biaronz perquei che lur vocaziun sforza els dad accumpignar la veta cun plema critica, ludond quei ch'ei da renconuscher, mo era tuccond silla marscha, sch'ei fa da basegns. Era en nos dis, nua che tuts vulan haver raschun - e biars survegnan era cun repeter ed insister - duvrein nus tuttina aunc directivas claras per vegnir ord il labirint circumdont.
Gest en quei grau ha miu amitg attaschau, Vic Hendry, nuota fatg guoter u l'untgida sco norma. El ha - tuttavia buca puppergnaus dil destin - adina puspei tangau, oravontut en sias numerusas davosas ovras problems smacconts da nos dis, quei senza ir entuorn la buglia. Mo el ei nuota secuntentaus mo cun smaccar ora lezzas biergnas, anzi ha era adina puspei schau penetrar radis da speronza, motivs per vegnir sinse e direger la egliada ensiviars.
Vic Hendry ei per mei il scribent dil messadi direct, per tgi che vul udir, senza denton sfurzar a dies era mo ina buccadina da sia tenuta e concepziun (ch'ein positivas). E per exprimer ses profunds sentiments drova el in agen lungatg, romontschs trasatras, mo buca adina levs per tuts. Sco jeu enconuschel Vic Hendry: El sa buca far auter - e duei era gnanc empruar! Pertgei nus enconuschein el - sco scribent - mo sut quella tipica nodacasa. El damonda bia da sesez - e consequentamein era dils auters. Jeu stemel nundetg quella verdad nunfrisada, quei scriver tut agradora, era sch'ei tucca beinduras sil viv. Sia intenziun vul adina bein. Ed en quei grau ei Vic Hendry in exempel per biars che tschontschan e scrivan massa, mo dian tuttina nuot, vulend far mal a negin. A lezz'uisa sligian ins buca ils problems da nos dis.

Serasontga en activitad
65 onns - in tierm impurtont ella veta. Il temps da pensiun arriva. Per Vic Hendry munta quei prender comiau dalla scola. Dapi in quart tschentaner ha el mess a disposiziun sias forzas alla scola reala dil marcau da Schaffusa (avon el Grischun). In liung temps che ha purtau bia midadas en divers graus, schanegiond negin, era buca Vic Hendry. El sa denton far ventschidas ella satisfacziun d'haver prestau il meglier pusseivel, adina sustenius d'ina buna consorta plein capientscha.
Per Vic Hendry daventa sia 2. clamada (forsa eisi era l'emprema) - quella dil scribent, aschia sperein nus cun bia auters - ussa l'activitad per propi. Partend da quei che il giubilar ha schenghiau a nus Romontschs sil camp litterar - mo l'enumeraziun ei impressiunonta - savein nus s'imaginar con che ha da resortir dalla tiarza etappa d'ina veta aschi activa. Temps dat ei ussa avunda per tgirar contacts, per recaltgar, «luvrar si» e dilucidar novas apparenzas da nossa veta, societad, civilisaziun e cultura, oravontut en tiara romontscha. Entupond il bien amitg dacuort a Savognin duront la Scuntrada, vai jeu giu l'impressiun che Vic Hendry seigi cumpleinamein en arma. Sia arma ei il plaid scret, in dun exprimiu ch'ha mess dallas gadas en moviment sia plema. Vic Hendry drova quella occupaziun. El ha in grond cumin da lecturs ch'ei restaus fideivels e spetga vinavon.
Tscheu e leu po el ver muentau in u l'auter. Beinduras ei il resun forsa staus auters ch'il clom. Quei era - ed ei per cletg - meina stau manegiau sco in segn da desister. Anzi: Saver ch'ins ha detg e scret enzatgei, saver ch'ins ha aunc adina da dir (e munta) enzatgei, saver ch'ins ei adina staus acceptaus, - ni renviaus - quei tut ei raschun pli che sufficienta da gie far vinavon. Mo il curaschus sefiera oz ella publicitad, s'expona, prendend en cumpra tutta resca. E per saldo ein las grondas stentas buca stadas vanas. Renconuschientschas meritadas suttastrehan quei.
Cun la professiun ei Vic Hendry ussa a fin, denton maina cun la missiun da scribent engaschau. Quei sincereschel jeu publicamein al bien amitg che para forsa beinduras dad esser empau staunchels. Igl ei bien per el e per nus ch'el fetschi vinavon da scribent. Il giavisch il pli sincer che nus lessen metter silla meisa culs duns e gratulaziuns per ses 65. Bien engraziament per tut - ed aunc ina liunga e buna continuaziun!

GR 23-08-1985

 

 

 

VH1999
Jeu selegrel da saver presentar nies scribent tuatschin Vic Hendry sin quella pagina.

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

vic-backg-05.jpg